Elizabeth Taylor

D Elizabeth Rosemond Taylor, DBE (vilmol au: „Liz“ Taylor; * 27. Februar 1932 z Hampstead, London; † 23. März 2011 z Los Angeles, Kalifornie), isch e US-amerikanisch-britischi Filmschauspileri gsii. Si het Starruhm as Chinderdarstelleri erlangt un as Leading Lady vum Hollywood-Studio MGM, wu si vu 1942 bis 1958 unter Verdrag gsi isch. D Taylor het in vil vu dr rentabelschte Film vu dr Zyt mitgwirkt un isch as Karakterdarstelleri zwaimol mit em Oscar uuszaichnet wore. Dur ihri Ufdritt in Film wie Die Katze auf dem heißen Blechdach un Plötzlich im letzten Sommer isch ihre Namme äng mit dr Popularisierig vum dramatische Wärch vum Tennessee Williams verchnipft. Ihri Prominenz het d Elizabeth Taylor widerholt gnutzt go uf bolitischi un gsellschaftlgi Problem ufmerksam z mache; di grescht Resonanz het si mit ihre Fundraising-Aktivitete fir d AIDS-Ufklerig erziilt. Im Mai 2000 isch si vu dr britische Chenigi Elisabeth II. in dr Adelsstand ghobe wore. D Elizabeth Taylor isch im Februar 2011 wäg Härzbschwärde in e Chrankehuus z Los Angeles yygliferet wore un isch am 23. Merz 2011 gstorbe.